Spaljivanje Pusta 2004. godine

Vožnja Pusta na karnevalskim kolima 2006.

Pusna šentenca 1976. ili možda 1977. godine:

POŠTOVANI SVITE MEDULINA I OKOLICE!

Pozdravljan svi pošteni i nepošteni furešti i domaći svit, ki se u ovako veliken broju skupija na ovoj našoj lipoj i dičnoj medulinskoj Placi. Tu smo se skupili da sudimo oven manigoldu. Ta dežgracija i ljudska napast je cilo pasano lito po selu klatija, alamaka ija i pija, ljude šempijiva i žene nan kojoniva.

Kako znamo, Medulin je jeno lipo misto poznato u svitu, a i u okolici. Ne se reče za niš da više vridi jena škrapa u Pineti, nego najveći brig priko Vrčevana.

U ten našen mistu, od lanin na ovamo, čuda se tega dogodilo.

Za sve ča se dogodilo umišan je ovi gospodin kega smo ulovili, da bimo mu večeras tu sudili.

Po prvoj točki sud ima besidu ovakovu:

1. U februaru je po selu hodija i svin ženan po kućan je govorija da je zaša zakon da moru golede, pinjate, vrčine i svu drugu šporku vodu po česti prolivati, jer da se tako od šporke vode ašvalto more mantinjati i 10 lit duže durati.

2. Sve vlasnike novih kuć u Medulinu je šempijiva da zaprtu fonju delati ne valja. Na jenen zidu fonje da triba čep puštiti i kad pada daž da ga triba opriti. Tako će se fonja vreda sprazniti, a ljudi neće špendivati i pumpafonje plaćati.

3. Škovacini pitaju čuda šoldi za odvoz škovac, pa je ljude naputija da škovace vozu sami. Tako i tako da je čuda kav oko sela. Oko tih kav se naleglo pantagan. Niki dan jena pršona (a to je ova porkarija) razglasija je po selu da je na cintineran vidija »vukodlaka« i sada ljudi od straha ne rivaju hititi škovace u kavu, nego ih skrenu na srid puta.

4. Pasano lito po selu je propagandu vodija i svaku fameju u Medulinu nagovara i šempijiva nek si breka prokura. I svi su počeli nabavljati breke, ma miga za lov - vraga (kan de lušo) sve ča je grđi to bolje, jer da će na njih dobivati premijo. Sada je po selu brekih: malih, velikih, čupavih, dlakavih, oguljenih, a najviše ih je po Placi, jer svako jutro ih gospodari puštu van, da ko bi dobili premijo.

5. Kad smo već koli blaga, znamo da je u Medulinu napro malo kokoš, a i ono malo ča je, bi ova dežgracija stija uništiti. Jenu ženu je naputija da si tuži susedu radi peteha. Sud je dosudija da se peteh treba ubiti, jer da ima »izofreniju« (kako i gospodarica). a to van je bolest nesanica. Tako da peteh vajk kanta, pa budi nju i njezine furešte u svaku dobu dana i noći.

6. U Medulinu je u liti oprto najmanje 20 oštarij, a u zimi nanke jena, jer kad se pobere skorup, zač da se srče žur. Tako je reka naš dični tuženi.

7. Ti vrag je natenta ljude da opru zlatarije (nike filigrane), jer da su turišti goloži na luštro kaj keke, a stija bi i zagnati žene ča prodaju frute i verduru, jer da se više zaradi od suvenirih.

8. Lani u šetembru jedan privatni gospodar (obrtnik) doša ga je zvati da neka ga dođe s auton poteći, jer da je osta u blatu. Ti vrag kuntento je iša i čovika za svin kombijen na mistu rebalta u blato. Čovik je zaša van svi rabijan, a on mu govori: »Ča san ja vraga zna, ti si reka da si obrtnik, a ja san te obrnuja«.

9. Od mala je u Medulinu otkriven novi nogometni talent. Kad su ga pitali ko će igrati za Medulin reka je da je za takovu škvadru maša dobar i da ko će more poći u Španjolsku reprezentaciju. Beata ura da je prije poša, jer ko su Španjolci svi takovi kaj on danas bimo na svjetskon prvenstvu bili mi, a ne oni.

10. Zlobnici govoru da je medulinski nogometni klub kaj balun na kaktusu i da je pitanje šekonda kad će se raspasti, a optimisti trdo viruju da sigurno neće pasti u niži rang. Ova dežgracija je poša za trenera i da je službenu izjavu da je s klubon sve u redu, samo da bi se stilo nabaviti još jenega dobrega centarfora, dva krila, dva vezna, dva halfa, centarhalfa, dva beka, golmana i više niš. Po njegovin besidan uspjeh bi bija siguran, a neuspjeh zagarantiran.

11. Na šeduti u Puli je govorija da se Medulin proširija. Kumpaniju od pumpjerih da triba osnovati, da bi se Medulin gradon moga zvati.

12. Jena šinjorina se nudila oven dežgraciju da će mu biti mlada. On je zajno pita ko za šerijo ili škerac, a ona mu je rekla da za vero. Ondar je on nju pita ko zna kopati brajdu, a ona je rekla da ne. »A znaš krpati škvajnere« Bilo je drugo pitanje. Zamisto da odgovori, pitala ga je ča je to. Na to se on rabija i reka: »Draga moja, mi nimamo više ča govoriti, jer ti nisi ni za čkerac, a kamoli za vero«.

13. Jučer je napa suca i porotu i reka da bi bilo bolje da si oko kuć očistu škovace, nego ča se lovidu oko njega. Jer samo oni da su krivi da mu se svako lito sudi prid tolikin sviton.

Za sve zlo ča je ta dežgracija učinija, časni sud osudija ga je na smrt vješanjem i paljenjem.

SPALJIVANJE PUSTA

Pust je po narodnom običaju alegorijski krivac za sve zlo što se dogodilo u protekloj godini. Zato ga se na pusni utorak cijeli dan vozi karnevalskim kolima i pokazuje narodu, a navečer biva izveden pred sud, optužen i osuđen, što uvijek završava njegovim vješanjem i spaljivanjem.

Prije nego što Časni sud izrekne presudu tužitelj čita šentencu (mišljenje o krivnji, optužbu) u kojoj iznosi što se zlo dogodilo, a za što se okrivljuje Pusta. Nakon što Časni sud izrekne obveznu smrtnu presudu izvršava se presuda uz glasno odobravanje okupljenog naroda.